Salmos 124

¹ שִׁיר הַֽמַּעֲלוֹת לְדָוִד לוּלֵי יְהוָה שֶׁהָיָה לָנוּ יֹֽאמַר ־נָא יִשְׂרָאֵֽל ׃

² לוּלֵי יְהוָה שֶׁהָיָה לָנוּ בְּקוּם עָלֵינוּ אָדָֽם ׃

³ אֲזַי חַיִּים בְּלָעוּנוּ בַּחֲרוֹת אַפָּם בָּֽנוּ ׃

⁴ אֲזַי הַמַּיִם שְׁטָפוּנוּ נַחְלָה עָבַר עַל ־נַפְשֵֽׁנוּ ׃

⁵ אֲזַי עָבַר עַל ־נַפְשֵׁנוּ הַמַּיִם הַזֵּֽידוֹנִֽים ׃

⁶ בָּרוּךְ יְהוָה שֶׁלֹּא נְתָנָנוּ טֶרֶף לְשִׁנֵּיהֶֽם ׃

⁷ נַפְשֵׁנוּ כְּצִפּוֹר נִמְלְטָה מִפַּח יוֹקְשִׁים הַפַּח נִשְׁבָּר וַאֲנַחְנוּ נִמְלָֽטְנוּ ׃

⁸ עֶזְרֵנוּ בְּשֵׁם יְהוָה עֹשֵׂה שָׁמַיִם וָאָֽרֶץ ׃